fluors - Concert-matinée da la fuormaziun vocala engiadinaisa ENsemble

Davo il success dals concerts dals ons 2024 e 2025, s’allegra l’ENsemble da’s preschantar eir quist on al public cun ün program varià da chant a cappella. Il tema dal proget da chant 2026 es "fluors". Ils concerts spordschan ün püschel da chanzuns dedichadas a las fluors, al flurir ed al prosperar. La flur vain suvent dovrada simbolicamaing in chanzuns d’amur impustüt dal temp da la romantica. Our da quel temp gnaran preschantadas ün pêr "perlas" da Joseph Rheinberger, Franz Schubert ed Anton Bruckner. Sper quai, gnaran chantats eir madrigals dal tard renaschimaint (Maddalena Casulana, John Wilbye) ed eir diversas chanzuns da cumponists contemporans cuntschaints, tanter oter Philip Stopford, Peter Appenzeller e Marco Maiero. Ün concert da taimpra sentimentala e paschaivla. Per cuntrasts musicals al chant a cappella pissera üna pitschna fuormaziun dad instrumaints a corda. Cun la matinée laina cumanzar insembel il nouv di cun clings quiets, inromats dal mumaint mistic da la bunura.