Johannespassion J.S. Bach – ensemble vocal incantanti

Cun la «Johannesspassion» da Johann Sebastian Bach sa deditgescha l'ensemble vocal incantanti sur ils dis da Pasca ad ina da las pli grondas ovras da la litteratura chorala insumma. "La finamira n'è betg sco ultim era quella che las chantaduras e chantadurs giuvens possian crescher a chaschun da quest'ovra gronda tant en moda cantica, artistica sco era umana", declera il manader dal chor Klucker la tscherna ambiziusa da l'ovra. Ils commembers da l'ensemble pon dentant quintar in sustegn professiunal, sco usità. Uschia collavura l'ensemble vocal incantanti cun il Capriccio Barockorchester da Basilea. Medemamain munida cun fitg bler renum è la glista da las solistas e dals solists che l'ensemble vocal incantanti ha pudì gudagnar per quest project. I vegnan interpretadas tranter auter las vuschs da Maximilian Vogler (tenor - Evangelist e Aria), Dominik Wörner (bass - Pilatus e Aria), Grégoire May (bass - Jesus), Stephanie Pfeffer (sopran) e Barbara Erni (alt).