Fiasta da giubileum - 150 onns Musica Sedrun

Sonda, ils 24 da matg 2025 organisescha la Musica Sedrun la fiasta da giubileum sin siu anniversari rodund da 150 onns ella halla plurivalenta Dulezi a Sedrun. La fiasta da giubileum duei dar la pusseivladad da s'entupar, da seregurdar e da far fiasta ensemen. Sper tut las persunas che ein stadas colligiadas fermamein cun la musica sco anteriur/-a dirigent/a, commember/-ra activ/-a, tambur/-a ni majoretta ein era la populaziun ed ils hosps dall'entira Val Tujetsch sco era hosps d'ordeifer envidai a quella fiasta. El decuors dil di vegnan differentas formaziuns da musica a sepresentar el liug da fiasta (Societad da musica Mustér, Sunatibas d'alp Tujetsch, Ils Vagabunds, Corns da catscha Badus, Uniun da tamburs Mustér). La sera suonda igl act festiv cun in concert dalla Musica Sedrun. Silsuenter sepresentan la formaziun da brass "Unglaublech", Dario Hess & Band, DJ MarcMind. Per il beinstar corporal procura ina purschida da "Streetfood" (mira flyer), la sera dat ei ustria e bar.