Sur cunfins - dus concerts nua che la chanzun rumantscha stat el center, ma er cun in pèr surpraisas internaziunalas.

Il Chor maschadà Chor Rezia Bassa ed il Chor dils Larischs han decidì da sa preschentar questa primavaira communablamain al public. E quai fan els cun mintgamai surpassar ils cunfins geografics da lur regiun da tschep. Il Chor maschadà Rumantsch Rezia Bassa è da chasa ed activ cunzunt en la Val dal Rain Songagliaisa. Ses commembers arrivan da la regiun tranter Buchs, Glaruna e Ragaz Bogn. Dapi prest 40 onns tgira e promova el surtut la chanzun rumantscha. Il Chor dils Larischs è da chasa a Cuira e conturn. Er tar quel chor stat la tgira da la chanzun rumantscha en il center da sias activitads. Ma el fa adina puspè excurs en autras culturas, autras linguas ed autras atmosferas canticas. El va pia quest onn sur cunfins betg mo geograficamain, mabain er cun ses program.